Dakarun Juyin Juya Halin Iran (IRGC) sun ce sun harbo wani jirgin sama maras matuƙi kirar MQ-9 mallakin rundunar sojin Amurka a sararin samaniyar tsibirin Qeshm da ke kudancin Iran.
Sashen hulɗa da jama’a na IRGC ya bayyana cewa an harbo jirgin ne da misalin ƙarfe 10:12 na safiyar yau, agogon ƙasar Iran, ta hanyar amfani da wani sabon tsarin kariyar sararin samaniya da rundunar ta ce na zamani ne.
A cikin sanarwar, IRGC ta kuma ce wannan shi ne jirgin MQ-9 na Amurka na 53 da dakarun Iran suka yi ikirarin lalatawa.
Sai dai har yanzu wannan bayanin ya kasance da’awar rundunar IRGC, kuma ba a bayyana wata sanarwa mai zaman kanta da ta tabbatar da harbo jirgin ba.
